ବଣମଲ୍ଲୀ

କିଛିଦିନ ତଳର ଘଟଣା । ପ୍ରତିଦିନ ପରି ସେଦିନ ମଧ୍ୟ ଭିକାରୁଣୀଟି ତା'ର ନିରାଶ୍ରୟ ଓ ଅଭାବ ଅନାଟନରେ ପ୍ରପୀଡ଼ିତ ଜୀବନ ମଧ୍ୟରେ ଭୋକିଲା ପେଟରେ ଦାନାଟିଏ ଦେବା ଆଶାରେ ରେଳ ଷ୍ଟେସନର ଏକ କୋଣରେ ବସି ଭିକ୍ଷା ବୃତ୍ତି କରୁଥାଏ । ତତସହିତ ପଦୁଟିଏ ଲେଖାଏଁ ଗୀତ ଆବୃତ୍ତି କରି ମନର କଷ୍ଟକୁ ଛାତିରେ ଚାପି ରଖୁଥାଏ । ହେଲେ ଏ ଆଧୁନିକ ଯୁଗରେ କିଏବା ତା' ଗୀତକୁ ଶୁଣୁଛି । ମୋବଇଲ ରେ ହ୍ବାଟ୍ସଆପ୍, ଫେସବୁକ ଭଳି ମନୋରଞ୍ଜନ ଭିତ୍ତିକ ସାମଗ୍ରୀରେ ସମସ୍ତେ ପାଗଳପ୍ରାୟ । କେହି କେହି ତା' ଆକୁଳ ନିବେଦନକୁ ଅଣଦେଖା କରି ଚାଲି ଯାଉଥା'ନ୍ତି ତ ଆଉ କେହି କେହି ତା' ଦାରିଦ୍ର୍ୟତାର କଷ୍ଟକୁ ହୃଦୟଙ୍ଗମ କରି ଭିକ୍ଷାଥାଳିରେ ପଇସାଟିଏ ଦେଇ ଆପଣା ବାଟରେ ଚାଲି ଯାଉଥା'ନ୍ତି ।

ହଠାତ୍ କେହି ଜଣେ ବ୍ଯକ୍ତି ଭିକାରୁଣୀଟିର କଣ୍ଠସ୍ବର ଶୁଣି ପାଖକୁ ଆସି କହିଲେ, ମାଉସୀ ଆପଣତ ବହୁତ ସୁନ୍ଦର ଗୀତ ବୋଲୁଛନ୍ତି । ସେ ବ୍ଯକ୍ତିଙ୍କ କଥା ଶୁଣି ଭିକାରୁଣୀଟିର ଦୁଃଖ ମିଶ୍ରିତ ମୁଖରେ ମୃଦୁ ହସ ଟିକିଏ ଖେଳିଗଲା । ତା'ପରେ ସେହି ଅଚିହ୍ନା ବ୍ୟକ୍ତି ଜଣଙ୍କ କହିଲେ, ମାଉସୀ ଆଉ ଗୋଟିଏ ଗୀତ ଶୁଣାନ୍ତୁ ତ । ଭିକାରୁଣୀଟି ଅନୁରୋଧ ରକ୍ଷାକରି ତା' କୋମଳ କଣ୍ଠରେ ଗୀତଟିଏ ଆବୃତି କରିବା ମୁହୂର୍ତ୍ତରେ, ବ୍ଯକ୍ତି ଜଣଙ୍କ ସେ ଦୃଶ୍ୟକୁ ମୋବାଇଲ୍ ସାହାଯ୍ୟରେ କଏଦ କରି ନେଇଥିଲେ । ଗୀତଟି ତା'ଙ୍କୁ ଭାରି ଭଲ ଲାଗିଲା । ତେଣୁ ସେ ଭିଡିଓଟିକୁ ଫେସବୁକରେ ପ୍ରସାରିତ କରିଦେଲେ ।ଦିନକୁ ଦିନ ଗଣମାଧ୍ୟମରେ ସେହି ଭିଡିଓର ଚାହିଦା ବେଶ୍ ବଢିବାକୁ ଲାଗିଲା । ସମୟ ଆସିଲା, ବିଭିନ୍ନ ମଞ୍ଚରେ ସଙ୍ଗୀତ ପରିବେଷଣ କରିବା ନିମନ୍ତେ ଭିକାରୁଣୀଟିକୁ ନିମନ୍ତ୍ରଣ କରାଗଲା । ମଞ୍ଚରେ ତା' ସୁମଧୁର କଣ୍ଠସ୍ୱରର ପ୍ରତିଧ୍ୱନି ସମସ୍ତଙ୍କୁ ତାଜୁବ୍ କରିଦେଲା । ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟି ଆସିଲା ଏବଂ ପ୍ରତିଟି ସାମାଜିକ ଗଣମାଧ୍ୟମରେ ସେ ଚର୍ଚ୍ଚିତ ଚେହେରା ରୂପେ ପରିଗଣିତ ହୋଇଗଲେ । କିଛି ସହୃଦୟ ବିଖ୍ୟାତ ବ୍ୟକ୍ତି ବିଶେଷ ତାଙ୍କ ପ୍ରତି ସହାୟତାର ହାତ ବଢ଼ାଇଲେ ଏବଂ ଚଳଚ୍ଚିତ୍ରରେ କଣ୍ଠଶିଳ୍ପୀର ସ୍ଥାନ ଦେବାପାଇଁ ପ୍ରତିଶୃତି ମଧ୍ୟ ଦେଲେ । ଚାହୁଁ ଚାହୁଁ ତାଙ୍କ ଜୀବନର ଗତିପଥ ବଦଳିଗଲା । ସାମାଜିକ ପରିବେଶରେ ସେ ବେଶ୍ ପରିଚିତ ହେଲେ ।

ତ ଆପଣମାନେ ଏ ସାରାଂଶରୁ ହୃଦବୋଧ କରି ପାରୁଥିବେ ମୁଁ କାହା ସମ୍ପର୍କରେ ଆଲୋଚନା କରିଛି । ସତରେ, କୋକୀଳ କଣ୍ଠି ରାନୁ ମଣ୍ଡଲ ଦିନେ ବଣମଲ୍ଲୀଟିଏ ପରି ସମାଜ ଆଖିରେ ଅବହେଳିତ ହୋଇ ରହିଯାଇଥିଲେ । ଆଉ ତାଙ୍କୁ ଭିକାରୁଣୀରୁ ଜଣେ ସୁନ୍ଦର କଣ୍ଠଶିଳ୍ପୀର ରୂପ ଦେବା ପଛରେ ଅତିନ୍ଦ୍ର ଚକ୍ରବର୍ତ୍ତୀଙ୍କ ଭୂମିକା ବେଶ୍ ଗୁରୁତ୍ବପୂର୍ଣ୍ଣ ଥିଲା । ନୋହିଲେ, ବଣମଲ୍ଲୀଟି ସ୍ବପ୍ନରେ ବି କେବେ ଭାବି ନଥିଲା, ଦିନେ ତା' ମହକ ତାକୁ ସାରା ସଂସାରରେ ପରିଚିତ କରାଇଦେବ ।

ତେଣୁ ପ୍ରିୟ ପାଠକ ଗଣଙ୍କୁ ମୋର ବିନମ୍ର ଅନୁରୋଧ, ଆପଣମାନଙ୍କ ଦୃଷ୍ଟି ଆଢୁଆଳରେ ଆସୁଥିବା ପ୍ରତିଟି ବଣମଲ୍ଲୀର ଲୁଚି ରହିଥିବା ପ୍ରତିଭାକୁ ଲୋକଲୋଚନକୁ ଆଣି ତା'ର ପ୍ରଚାର ପ୍ରସାର କରିବା ନିମନ୍ତେ ସଂକଳ୍ପବଦ୍ଧ ହେବେ । ତେବେ ଯାଇ ସେମାନଙ୍କ ଅନ୍ତର୍ନିହିତ ଶକ୍ତିର ପରିପ୍ରକାଶ ହୋଇ ପାରିବ ଏବଂ ସେମାନେ ପ୍ରଦୋଷ ସ୍ପର୍ଶରେ ଝଡ଼ି ପଡ଼ିବା ପୂର୍ବରୁ ଆଲୋକର ଆଭାରେ ଝଲସି ଉଠି ସମାଜକୁ ପ୍ରେରଣା ଦେଇ ପାରିବେ ।